Էսքան ճամփա՝ մեկ նախադասության համա՞ր. մարզերի ԲԿ տնօրեններին իզուր տեղը հասցրել են Երևան

Այսօր Առողջապահության նախարարությունում բավականին տարօրինակ ու տհաճ իրավիճակ է ստեղծվել։ Հանրապետության բոլոր պետական բուժհաստատությունների ղեկավարներին ժամը 15:30-ին հրավիրել են նախարարություն՝ մասնակցելու լիցենզավորման հանձնաժողովի նիստին։

Մարզերից, անգամ հեռավոր Սյունիքից եկած տնօրենները մի քանի ժամ ճանապարհ են կտրել, որպեսզի ներկա լինեն քննարկմանը։ Սակայն, ըստ լուրերի, նրանց նույնիսկ ներս չեն թողել։ Նախարարության դիմաց հավաքվածներին մի կին է մոտեցել ու ընդամենը մեկ նախադասություն փոխանցել լիցենզիաների ժամկետների մասին. հիվանդանոցներինը՝ մինչև հունիսի 16-ը, պոլիկլինիկաներինը՝ մինչև դեկտեմբերի 16-ը։

«Քոռ ու փոշման» տնօրենները մնացել են զարմացած. եթե ընդամենը սա էր ասվելիքը, ինչո՞ւ էին մարդկանց գործից կտրում ու հասցնում Երևան, երբ կարելի էր պարզապես գրավոր ծանուցել։