Լավրովը «բացել է խաղաքարտերը». ի՞նչ է սպասվում Թրամփի օրոք և ի՞նչ է լինելու Ուկրաինայի հետ

Ռուսաստանի արտաքին գործերի նախարար Սերգեյ Լավրովը մի շարք աղմկահարույց հայտարարություններ է արել համաշխարհային քաղաքականության վերջին զարգացումների վերաբերյալ։ Ըստ նրա՝ չնայած սպասումներին, Դոնալդ Թրամփի վարչակազմը ոչ միայն չի թուլացնում, այլև ընդլայնում է Ռուսաստանի դեմ պատժամիջոցները։

Լավրովը նշել է, որ ԱՄՆ-ն այժմ փորձում է ստեղծել նոր ռազմական բլոկ, որտեղ Ուկրաինան պետք է ունենա առաջատար դեր։ Միևնույն ժամանակ, նա զգուշացրել է, որ Եվրամիության ռազմականացումը տեղի է ունենում «արագ և բուռն», ինչը լրացուցիչ լարվածություն է ստեղծում տարածաշրջանում։

Անդրադառնալով Իրանի հարցին՝ նախարարն ընդգծել է, որ Մոսկվան կընդունի ուրանի հարստացման հարցի ցանկացած լուծում, որը կբավարարի Իրանին։ Նա նաև քննադատել է Եվրամիությանը՝ Իրանի դեմ պատժամիջոցների հարցում «խարդախություն» կազմակերպելու համար։ Ռուսաստանը նաև մտադիր է շարունակել աջակցությունը Կուբային՝ նավթի մատակարարումների տեսքով։

Լավրովի խոսքով՝ ի տարբերություն Բայդենի ժամանակաշրջանի, ռուս-ամերիկյան հարաբերություններն այժմ «սառեցված» չեն, բայց դա դեռ չի նշանակում, որ լարվածությունը նվազել է։