Դատարանն արգելել է ՀԱՕԿ նիստը. Ծառուկյանի լիազորությունները վիճարկվում են

Հայաստանի սպորտային աշխարհում լուրջ իրավական սկանդալ է հասունանում։ Ծանրամարտի ֆեդերացիան դիմել է դատարան՝ վիճարկելով Հայաստանի ազգային օլիմպիական կոմիտեի (ՀԱՕԿ) նախագահ Գագիկ Ծառուկյանի լիազորությունները։

Բանն այն է, որ Ծառուկյանն այդ պաշտոնում ընտրվել էր 2021-ին՝ 4 տարի ժամկետով, որն արդեն սպառվել է 2025-ի սեպտեմբերի 9-ին։ Քանի որ նոր ընտրություններ չեն եղել, ֆեդերացիան պահանջում է անվավեր համարել այդ ժամկետից հետո նրա կողմից կայացված բոլոր որոշումներն ու գործողությունները։

Դատարանն արդեն իսկ բավարարել է հայցի ապահովման միջոցը՝ արգելելով ՀԱՕԿ-ին ապրիլի 11-ին նախատեսված Գլխավոր ասամբլեայի հատուկ նիստն անցկացնել, մինչև գործի վերջնական քննությունը։ Սա նշանակում է, որ օլիմպիական կոմիտեում ստեղծված իրավիճակը դեռ երկար կքննարկվի դատական դահլիճներում, իսկ Ծառուկյանի լեգիտիմությունը հարցականի տակ է դրված։