Իսրայելը «հողին է հավասարեցնում» Լիբանանը. 254 զոհ և 1100-ից ավելի վիրավոր

Իսրայելական բանակը պատերազմի սկզբից ի վեր ամենահզոր հարվածն է հասցրել Լիբանանին։ Թիրախում են հայտնվել Բեյրութը, Բեկաայի հովիտն ու երկրի հարավային շրջանները։ Ընդհանուր առմամբ հարձակման է ենթարկվել «Հեզբոլլահի» ավելի քան 100 թիրախ, սակայն հարվածները բաժին են հասել նաև խիտ բնակեցված թաղամասերին։

Սարսափելի վիճակագրություն. Լիբանանի առողջապահության նախարարության տվյալներով՝ ընդամենը մեկ օրվա ընթացքում զոհերի թիվը հասել է 254-ի, իսկ վիրավորներինը՝ 1100-ի։ Օպերացիային մասնակցել են մոտ 50 կործանիչներ, որոնք մի քանի րոպեում 160-ից ավելի մարտական միջոց են արձակել։

Չնայած տարածաշրջանում հրադադարի մասին խոսակցություններին, Իսրայելի վարչապետ Բենիամին Նեթանյահուն շեշտել է, որ Իրանի հետ համաձայնությունները Լիբանանի վրա չեն տարածվում։ Վերջին մեկ ամսում Լիբանանում զոհերի թիվն արդեն անցել է 1500-ը, իսկ տեղահանվածների թիվը հատել է մեկ միլիոնի սահմանը։